ТӨРИЙН ӨМЧИТ ХУВЬЦААТ КОМПАНИД ИНЖЕНЕР, АЛБАНЫ ДАРГААР АЖИЛЛАЖ БАЙСАН ХҮНИЙГ “НИЙТИЙН АЛБАН ТУШААЛТАН” ГЭЖ ҮЗЭВ

Товч мэдээ :

ТӨРИЙН ӨМЧИТ ХУВЬЦААТ КОМПАНИД ИНЖЕНЕР, АЛБАНЫ ДАРГААР АЖИЛЛАЖ БАЙСАН ХҮНИЙГ “НИЙТИЙН АЛБАН ТУШААЛТАН” ГЭЖ ҮЗЭВ

2025-03-7, 15:54
373

Шийдвэрийн дугаар: 2024 оны 11 дүгээр сарын 18-ны өдөр №152
Шийдвэрийн төлөв: Хүчин төгөлдөр болоогүй.
2025.02.17 шийдвэр-тойм: №4

Санамж: Энэ тойм нь шүүхийн бүрэн гүйцэд шийдвэр биш бөгөөд түүнийг орлохгүй, зөвхөн олон нийтэд ойлгомжтой байдлаар мэдээлэл хүргэх зорилготой болохыг тэмдэглэв. Нийслэлийн Эрүүгийн хэргийн давж заалдах шатны шүүхийн магадлалын дэлгэрэнгүйтэй https://shuukh.mn холбоосоор танилцана уу.

Прокуророос Э.Э-г “Эрх мэдэл, албан тушаалын байдлаа урвуулан ашиглах” гэмт хэрэг үйлдсэн гэж үзэж, яллах дүгнэлт үйлдэн хэргийг шүүхэд шилжүүлснийг анхан шатны шүүх түүнийг гэмт хэргийг үйлдсэн гэм буруутайд тооцож шийдвэрлэсэн байна.

Шүүгдэгчийн өмгөөлөгч А.А болон шүүгдэгч Э.Э нар нь “...эрхэлж байсан албан тушаал нь Авлигын эсрэг хуулийн 4.1.3 дахь хэсэгт зааснаар “Төрийн болон орон нутгийн өмчит, төрийн болон орон нутгийн өмчийн оролцоотой хуулийн этгээдийн удирдах болон компанийн эрх бүхий албан тушаалтан... биш тул анхан шатны шүүхийн шийдвэрийг бүхэлд нь хүчингүй болгож өгнө үү...” гэсэн агуулга бүхий давж заалдах гомдол гаргажээ.

Монгол Улсын нэгдэн орсон Авлигын эсрэг Нэгдсэн Үндэстний Байгууллагын конвенцэд “Төрийн албан тушаалтан гэж ... улсын үйлдвэрийн газарт төрийн чиг үүрэг гүйцэтгэдэг, эсхүл төрийн үйлчилгээ үзүүлдэг хүнийг, оролцогч улсын дотоодын хууль тогтоомжид төрийн албан тушаалтан гэж тодорхойлсон хүнийг хэлнэ” гэж тодорхойлсон байна.
Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 4 дүгээр зүйлийн 4.1, Авлигын эсрэг хуулийн 4 дүгээр зүйлийн 4.1 дэх хэсгийн 4.1.3-д авлига, ашиг сонирхлын хуулийн үйлчлэлд хамаарах этгээдэд “төрийн болон орон нутгийн өмчит, төрийн болон орон нутгийн өмчийн оролцоотой хуулийн этгээдийн удирдах болон компанийн эрх бүхий албан тушаалтан” гэж хамруулсан байдаг төдийгүй, Компанийн тухай хуулийн 84 дүгээр зүйлийн 84.1 дэх хэсэгт “...компанийн албан ёсны шийдвэрийг гаргахад болон гэрээ, хэлцэл хийхэд шууд болон шууд бусаар оролцдог этгээдийг компанийн эрх бүхий албан тушаалтанд тооцно” гэж хуульчлан тодорхойлсон байна.

Э.Э нь “...” ТӨХК-ийн шугам сүлжээний инженер болон албаны даргаар ажиллаж байхдаа нийтийн эрх зүйн хэм хэмжээний хүрээнд шугам сүлжээнд холбох талаар захиалагчаас ирүүлсэн хүсэлтийг судалж, инженерийн тооцоо судалгааг үндэслэсэн техник-технологийн дүгнэлтийг олгох төрийн үйлчилгээ, нийтийн чиг үүргийг хэрэгжүүлж, холбогдох журмын дагуу зохих цалин хөлс авч ажилладаг хүний хувьд Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн үйлчлэлд хамаарах Эрүүгийн хуулийн тусгай ангийн 22.1 дүгээр зүйлийн 1 дэх хэсэгт заасан “Нийтийн албан тушаалтан мөн” гэж давж заалдах шатны шүүх дүгнэв.
Шүүгдэгч Э.Э нь "..." ТӨХК-ийн Дулааны шугам сүлжээний албаны даргаар ажиллаж байхдаа ТӨХК-д хандаж хүсэлт гаргасан иргэдэд компанийн өмнөөс техникийн нөхцөл олгохдоо албан тушаалын байдлыг хувийн ашиг сонирхлоо гүйцэлдүүлэх зорилгоор өөрийн эхнэрийн "О" ХХК-ийг ашиглан "..." ТӨХКомпанийн ажилтнуудаар дулааны болон бохирын шугам холбох ажлыг гүйцэтгүүлж, ажлын төлбөрт иргэдээс 65.000.000 төгрөгийг авч өөртөө эдийн давуу байдал бий болгосон, улмаар өөрийн эхнэрийн "О" ХХК-ийг ашиглан уг барилга байгууламжийн дулааны шугам болон бохирын шугам холбох ажлыг гүйцэтгэсэн атлаа барилгыг ашиглалтад оруулах улсын комиссын бүрэлдэхүүнд “...” ТӨХКомпанийг төлөөлж ажиллан албан тушаалын байдлыг албаны эсрэг урвуулан ашиглаж, комиссын дүгнэлтэд гарын үсэг зурж дулааны шугам, сүлжээний ажлыг хүлээн авч бусдад байдал бий болгосон нь Эрүүгийн хуулийн тусгай ангийн 22.1 дүгээр зүйлийн 1 дэх хэсэгт заасан гэмт хэргийн шинжийг бүрэн хангасан хэмээн дүгнэж анхан шатны шүүхийн шийтгэх тогтоолыг хэвээр үлдээж шийдвэрлэсэн болно.

Тойм бэлтгэсэн: Нийслэлийн Эрүүгийн хэргийн давж заалдах шатны шүүхийн шүүгч Ц.Оч